ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានសង្កត់ធ្ងន់ថា មូលធនមនុស្ស មិនមែនត្រឹមតែមានស្មារតី និងសមត្ថភាពប៉ុណ្ណោះទេ ប៉ុន្តែ ត្រូវមានសីលធម៌ និងគុណធម៌។ ការថ្លែងនេះបានធ្វើឡើងនៅក្នុងពិធីបិទមហាសន្និបាតវិសាមញ្ញកាយរឹទ្ធិជាតិកម្ពុជា កាលពីរសៀលថ្ងៃទី ១៧ ខែមិថុនា ឆ្នាំ ២០២៥។ សម្ដេចធិបតីបានបន្ថែមថា មូលធនមនុស្សគឺជាមូលដ្ឋានគ្រឹះក្នុងការកសាងឯករាជ្យម្ចាស់ការ និងការអភិវឌ្ឍប្រទេស។
សម្ដេចធិបតីបានគូសបញ្ជាក់ពីកិច្ចខិតខំប្រឹងប្រែងរបស់កម្ពុជាក្រោយបញ្ចប់សង្គ្រាម ក្នុងការកសាងធនធានមនុស្ស សេដ្ឋកិច្ច និងហេដ្ឋារចនាសម្ព័ន្ធ។
“ក្រោយសង្គ្រាមបានបញ្ចប់, កម្ពុជាបានខិតខំកសាងធនធានមនុស្ស, សេដ្ឋកិច្ច និងហេដ្ឋារចនា សម្ព័ន្ធ ដែលពីមុនយើងពឹងគេទាំងស្រុង តែបច្ចុប្បន្នយើងអាចធានាបាន និង ម្ចាស់ការដោយខ្លួនឯង ដែលនេះជាការធានាឯករាជ្យជាតិកម្ពុជារបស់យើង ហើយគោលដៅធំរបស់យើង គឺការទទួលខុសត្រូវចំពោះបូរណភាពទឹកដី, ការទទួលខុសចំពោះ ប្រជាជនកម្ពុជា និងការទទួលខុសត្រូវចំពោះឧត្តមប្រយោជន៍ជាតិ និងប្រជាជនកម្ពុជា។”
ទាក់ទងនឹងបញ្ហាព្រំដែនកម្ពុជា-ថៃ សម្ដេចធិបតីបានមានប្រសាសន៍ថា កម្ពុជារក្សាការអត់ធ្មត់ខ្ពស់ ហើយចង់ដោះស្រាយដោយសន្តិវិធី និងសន្តិភាព ដោយជ្រើសរើសយកច្បាប់អន្តរជាតិ។
“កម្ពុជា ជ្រើសយកច្បាប់អន្តរជាតិ ដោយនាំយកតំបន់ដែលកំពុងតានតឹងទាំង ៤ ទៅតុលាការយុត្តិធម៌អន្តរជាតិ (ICJ) ដើម្បីដោះស្រាយឱ្យដាច់ស្រេច, ដើម្បីជៀសវាងមានបញ្ហានាពេលអនាគតបន្តទៀត បើមិនដូច្នោះទេ តំបន់ទាំង៤នេះ នៅតែបន្តមានបញ្ហាមិនចេះចប់ ជាបន្តទៀត។”
ជាមួយគ្នានេះ សម្ដេចធិបតីក៏បានបញ្ជាក់ថា ការបើកព្រំដែនឡើងវិញ គឺភាគីដែលបិទជាឯកតោភាគីត្រូវបើកមុន ហើយកម្ពុជានឹងបើកតាមក្រោយ។ លោកបានសង្កត់ធ្ងន់ពីការប្ដេជ្ញាចិត្តការពារបូរណភាពទឹកដី អធិបតេយ្យភាព និងផលប្រយោជន៍ជាតិ។ លោកក៏បានថ្លែងអំណរគុណដល់ប្រជាពលរដ្ឋដែលបានចូលរួមគាំទ្រដល់កងទ័ព និងរាជរដ្ឋាភិបាល ដែលបង្ហាញពីស្មារតីសាមគ្គីជាតិដ៏សំខាន់៕
